EVENTS

THE REPUBLIC OF THE UNION OF MYANMAR

MINISTRY OF HEALTH AND SPORTS

DEPARTMENT OF MEDICAL RESEARCH

News in Brief


July 2019 Events


ဆေးသုတေသနဦးစီးဌာန ငွေစုငွေချေးသမဝါယမအသင်းလီမိတက်၏ ၂၀၁၈-၂၀၁၉ ဘဏ္ဍာရေးနှစ် နှစ်ပတ်လည်အရပ်ရပ်ဆိုင်ရာအစည်းအဝေးကျင်းပ

ဆေးသုတေသနဦးစီးဌာန ငွေစုငွေချေးသမဝါယမအသင်းလီမိတက်၏ ၂၀၁၈-၂၀၁၉ ဘဏ္ဍာရေးနှစ် နှစ်ပတ်လည် အရပ်ရပ်ဆိုင်ရာအစည်းအဝေးကို ၂၀၁၉ ခုနှစ် ဇူလိုင် ၄ ရက် မွန်းလွဲ ၁:၀၀ နာရီတွင် လူမှုဆေး ပညာသုတေသန အစည်းအဝေးခန်းမ၌ ကျင်းပခဲ့ပါသည်။ အဆိုပါအစည်းအဝေးတွင် အခမ်းအနားမှူးအဖြစ် အသင်းအတွင်းရေးမှူး ဦးစီးအရာရှိ (ဘဏ္ဍာရေး) ဒေါ်သီသီအေးက ဆောင်ရွက်ပြီး အခမ်းအနားအစီအစဉ်များ ကို ဖတ်ကြားအစီရင်ခံပါသည်။ ထို့နောက် သဘာပတိ အသင်းဥက္ကဌ ညွှန်ကြားရေးမှူး(အထွေထွေစီမံခန့်ခွဲရေး) ဒေါက်တာတင်ဦးက အဖွင့်အမှာစကားပြောကြားပြီး ဒဂုံမြို့နယ်သမဝါယမဦးစီးဌာန၊ ဦးစီးမှူး ဦးဝင်းဇော်က အမှာစကားပြောကြားခဲ့ပါသည်။

ထို့နောက် အမှုဆောင်အဖွဲ့၏၂၀၁၈-၂၀၁၉ ဘဏ္ဍာရေးနှစ် လုပ်ငန်းအစီရင်ခံစာ၊ ဘဏ္ဍာရေးရှင်းတမ်းနှင့် စာရင်းစစ်အစီရင်ခံစာတို့ကို ဖတ်ကြားအတည်ပြုချက်ရယူပါသည်။ ဆက်လက်၍ သဘာပတိ ဒေါက်တာတင်ဦး က နိဂုံးချုပ်အမှာစကားပြောကြားရာတွင် အသင်းသားများ၏အကျိုးအတွက် စုဆောင်းငွေများကို ပိုမိုတိုးမြှင့် စုဆောင်းကြရန်၊ အတတ်နိုင်ဆုံး ပြန်လည်ထုတ်ယူခြင်း မပြုကြရန်တိုက်တွန်းပြီး၊ ချေးငွေများကိုလည်း အသင်း သားများ၏လိုအပ်ချက်နှင့်အညီ အမှုဆောင်အဖွဲ့မှ စည်းကမ်းဥပဒေအတိုင်း ထုတ်ချေးသွားမည်ဖြစ်ကြောင်း၊ အသင်းသားဦးရေ တိုးပွားလာရန်လည်း ဌာနအကြီးအမှူးထံ တင်ပြစည်းရုံးလမ်းညွှန်မှုကို နာခံမည်ဖြစ်ကြောင်း ပြောကြားပြီး အစည်းအဝေးကို မွန်းလွဲ ၂:၀၀ နာရီတွင် ရုပ်သိမ်းလိုက်ပါသည်။ အဆိုပါအစည်းအဝေးသို့ ဒဂုံမြို့ နယ်သမဝါယမဦးစီးဌာန ဦးစီးမှူး ဦးဝင်းဇော်နှင့်တာဝန်ရှိသူများ၊ ဆေးသုတေသနဦးစီးဌာန ငွေစုငွေချေး သမဝါယမအသင်းလီမိတက်ဥက္ကဌနှင့် အမှုဆောင်အဖွဲ့ဝင်များ၊ အသင်းသား/အသင်းသူများ တက်ရောက်ခဲ့ကြ ပါသည်။


ကျန်းမာရေးစောင့်ရှောက်မှုအရှိန်မြှင့်တင်ရေးအတွက် ကောက်ယူထုတ်ပြန်ခဲ့သော မြန်မာနိုင်ငံလူနေမှုဘဝနှင့် ကျန်းမာရေးဆိုင်ရာ အခြေခံအချက်အလက်စစ်တမ်းမှစိစစ်တွေ့ရှိချက်အသစ်များ မျှဝေဆွေးနွေး

၂၀၁၉ ခုနှစ် ဇူလိုင် ၅ ရက် နံနက် ၉:၀၀ နာရီတွင် ပြည်သူ့ကျန်းမာရေးဦးစီးဌာန၊ အမေရိကန်နိုင်ငံတကာဖွံ့ဖြိုးရေးအေဂျင်စီ(USAID) နှင့် ICF International တို့ ပူးပေါင်းဆောင်ရွက်သော မြန်မာနိုင်ငံပြည်သူ့ကျန်းမာရေးကဏ္ဍနှင့် စပ်လျဉ်းသည့် စိစစ်တွေ့ရှိချက်အသစ်များကို သုတေသီ ၁၉ ဦးတို့က အလှူရှင်များ၊ မူဝါဒချမှတ်သူများနှင့် မျှဝေဆွေးနွေးသည့် တစ်ရက်တာအခမ်းအနားကို ရန်ကုန်မြို့၊ အလုံလမ်း၊ ဒဂုံမြို့နယ်ရှိ Summit Parkview Hotel (Yangon) Ballroom ၌ ကျင်းပပြုလုပ်ခဲ့ရာ ကျန်းမာရေးနှင့် အားကစားဝန်ကြီးဌာန၊ ဆေးသုတေသနဦးစီးဌာန ညွှန်ကြားရေးမှူးချုပ် ပါမောက္ခဒေါက်တာဇော်သန်းထွန်းနှင့် အမေရိကန်နိုင်ငံတကာဖွံ့ဖြိုးရေးအေဂျင်စီ၏ ဌာနေညွှန်ကြားရေးမှူး မစ္စစ်ထရီဆာမက်ဂီတို့ တက်ရောက်အမှာ စကားပြောကြားပြီး ဖွင့်လှစ်ပေးခဲ့ပါသည်။ ထို့နောက် ညွှန်ကြားရေးမှူးချုပ်နှင့်အဖွဲ့သည် ခန်းမအတွင်း ပြသ ထားသော သုတေသီများ၏ စိစစ်တွေ့ရှိချက်များ တင်ပြထားမှုကို လှည့်လည် စစ်ဆေးကြည့်ရှုခဲ့ကြပါသည်။

အဆိုပါစိစစ်တွေ့ရှိချက်များသည် အမေရိကန်နိုင်ငံတကာဖွံ့ဖြိုးရေးအေဂျင်စီနှင့် ထောင်စုနှစ်ဖွံ့ဖြိုးတိုးတက်ရေး ရည်မှန်းချက်သုံးမျိုး ရန်ပုံငွေအဖွဲ့တို့၏ ထောက်ပံ့မှုဖြင့် မြန်မာနိုင်ငံအတွင်း လူနေမှုဘဝနှင့် ကျန်းမာရေးဆိုင်ရာ အခြေခံ အချက်အလက်များကို အမျိုးသားအဆင့် ပထမဆုံးကောက်ယူခဲ့သော ၂၀၁၅-၁၆ ခုနှစ် မြန်မာနိုင်ငံ လူနေမှုဘဝနှင့် ကျန်းမာရေးဆိုင်ရာ အခြေခံအချက်အလက် စစ်တမ်းအပေါ် အခြေခံထားပြီး၊ ပညာရေးကဏ္ဍမှ သည် မိခင်နှင့်ကလေး ကျန်းမာရေး၊ အာဟာရနှင့် HIV/AIDS ကိစ္စရပ်များအထိ မြန်မာနိုင်ငံ တစ်ဝန်း အမျိုးသမီး ၁၂၈၈၅ ဦးနှင့် အမျိုးသား ၄၇၃၇ တို့ကို တွေ့ဆုံမေးမြန်းထားခြင်းဖြစ်ပါသည်။ အဆိုပါအခမ်းအနားသို့ ကျန်းမာရေးနှင့်အားကစားဝန်ကြီးဌာန၊ ဆေးသုတေသနဦးစီးဌာန ညွှန်ကြား ရေးမှူးချုပ် ပါမောက္ခဒေါက်တာဇော်သန်းထွန်းနှင့် တာဝန်ရှိသူများ၊ အလှူရှင်များ၊ မူဝါဒချမှတ်သူများ၊ သုတေသီပညာရှင်များ၊ အမေရိကန် နိုင်ငံတကာဖွံ့ဖြိုးရေးအေဂျင်စီ ဌာနေညွှန်ကြားရေးမှူး မစ္စစ်ထရီဆာမက်ဂီ နှင့်တာဝန်ရှိသူများ၊ ဖိတ်ကြားထားသူများ တက်ရောက်ခဲ့ကြပါသည်။


ဆေးသုတေသဦးစီးဌာန(ပြင်ဦးလွင်ရုံးခွဲ) အကြိမ်(၂၀)မြောက် ဝါဆိုသင်္ကန်း ကပ်လှူပူဇော်ပွဲကျင်းပခြင်း

ဆေးသုတေသဦးစီးဌာန (ပြင်ဦးလွင်ရုံးခွဲ)၏ အကြိမ်(၂၀)မြောက် ဝါဆိုသင်္ကန်း ကပ်လှူပူဇော်ပွဲကို ၂၀၁၉ ခုနှစ် ဇူလိုင် ၅ ရက် နံနက် ၁ဝ:၀၀ နာရီတွင် ဆေးသုတေသနဦးစီးဌာန (ပြင်ဦးလွင်ရုံးခွဲ)၏ အစည်း အဝေးခန်းမ (၁) ၌ကျင်းပပြုလုပ်ခဲ့ရာ ပြင်ဦးလွင်မြို့နယ်၊ ဒိုးပင်အောင်ကံသာဓမ္မရိပ်သာကျောင်း ဆရာတော် ဘဒ္ဒန္တဉာဏိက အမှူးပြု၍ ပင့်သံဃာ (၅)ပါး ကြွရောက်ချီးမြှင့်ခဲ့ပါသည်။

ရှေးဦးစွာဆရာတော်ကြီးက အနုမောဓနာတရား ဟောကြားချီးမြှင့်ပါသည်။ ထို့နောက်ဝန်ထမ်းများက ဝါဆိုသင်္ကန်းများ၊ လှူဒါန်းငွေများနှင့် လှူဖွယ်ပစ္စည်းများ ဆက်ကပ်လှူဒါန်းကြပြီး သံဃာတော်(၅)ပါးအား နေ့ဆွမ်းဆက်ကပ်လှူဒါန်းခဲ့ကြပါသည်။ ဆက်လက်၍ ဌာနရှိဝန်ထမ်းများအားလုံးအား အကျွေးအမွေးဖြင့် ဧည့်ခံခဲ့ပါသည်။

အဆိုပါဝါဆိုသင်္ကန်းကပ်လှူပူဇော်ပွဲသို့ ဒုတိယညွှန်ကြားရေးမှူးချုပ်(သုတေသန) ဒေါက်တာခင်စော အေးနှင့်အတူ ဌာနရှိအရာထမ်း/ အမှုထမ်းများ စုံညီစွာတက်ရောက်ခဲ့ကြပြီး သင်္ကန်း(၂၁)စုံ၊ ထီး(၁)လက်၊ ဖိနပ် (၂)ရံနှင့် နဝကမ္မအလှူတော်ငွေ(၁၄၀၀၀ိ)ကျပ်အား ဆပ်ကပ်လှူဒါန်းခဲ့ကြပါသည်။


သုတေသနပညာရပ်ဆိုင်ရာဟောပြောပွဲကျင်းပ

၂၀၁၉ ခုနှစ် ဇူလိုင် ၅ ရက် မွန်းလွဲ ၂:၀၀ နာရီတွင် သုတေသနပညာရပ်ဆိုင်ရာဟောပြောပွဲကို ဆေးသုတေသနဦးစီးဌာန အဆင့်မြင့်မော်လီကျူးသုတေသနဌာန အစည်းအဝေးခန်းမ(၂)၌ ကျင်းပပြုလုပ်ခဲ့ရာ သဘာပတိအဖြစ် ညွှန်ကြားရေးမှူး(သုတေသန) ဒေါက်တာဝါဝါအောင်က ဆောင်ရွက်ပြီး မိတ်ဆက်အမှာစကား ပြောကြားပါသည်။ အဆိုပါဟောပြောပွဲတွင် ရောဂါပြီး ဗေဒသုတေသနဌာနခွဲမှ ဒုတိယညွှန်ကြားရေးမှူး/ဌာနခွဲမှူး ဒေါက်တာအေးအေးလွင်က “27th Annual Conference of Asian Pacific Association for Study of the Liver”ခေါင်းစဉ်ဖြင့်လည်းကောင်း၊ အရည်အသွေးထိန်းသိမ်းရေးဌာနခွဲမှ ဒုတိယညွှန်ကြားရေးမှူး/ဌာနခွဲမှူး ဒေါက်တာယဉ်မင်းထွန်းနှင့် မော်လီကျူးနည်းပညာအသုံးချရေးဌာနခွဲမှ သုတေသနမှူး ဒေါက်တာနှင်းဥမ္မာစိုး တို့က “9th Diagnostic Cytopathology Workshop” ခေါင်းစဉ်ဖြင့်လည်းကောင်း အသီးသီးဟောပြော တင်ပြကြရာ တက်ရောက်လာကြသူများက စိတ်ပါဝင်စားစွာဖြင့် ဝိုင်းဝန်း ဆွေးနွေးမေးမြန်းခဲ့ကြပါသည်။ အဆိုပါဟောပြောပွဲသို့ ဆေးသုတေသနဦးစီးဌာနမှ ညွှန်ကြားရေးမှူးများ အပါအဝင် သုတေသီဝန်ထမ်း ( ၄၅) ဦး တက်ရောက်ခဲ့ကြပါသည်။


ဂျပန်နိုင်ငံ Miyazaki တက္ကသိုလ်နှင့် ဆေးသုတေသနဦးစီးဌာနတို့ ပူးပေါင်းဆောင်ရွက်ခဲ့သည့် ရေတွင်အာဆင်းနစ်ပါဝင်မှုဆိုင်ရာ သုတေသနတွေ့ရှိချက်များနှင့် ဆက်လက်ပူးပေါင်း ဆောင်ရွက်မည့် စီမံချက်လုပ်ငန်းတို့အား ပြည်ထောင်စုဝန်ကြီးထံရှင်းလင်းတင်ပြ

၂၀၁၉ ခုနှစ် ဇူလိုင် ၆ ရက် နံနက် ၉:၃၀ နာရီတွင် ဂျပန်နိုင်ငံ Miyazaki တက္ကသိုလ်မှ Professor Yoshitaka Hishikawa ၊ ဆေးသုတေသနဦးစီးဌာနမှ ညွှန်ကြားရေးမှူး(သုတေသန) ဒေါက်တာခင်ဖြူဖြူနှင့် တာဝန်ရှိသူများသည် ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေးအား ရန်ကုန်တိုင်းဒေသကြီး၊ ကျန်းမာရေးနှင့်အားကစားဝန်ကြီးဌာန ဧည့်ခန်းမ၌ သွားရောက်တွေ့ဆုံ၍ ဂျပန်နိုင်ငံ Miyazaki တက္ကသိုလ်နှင့် ဆေးသုတေသနဦးစီးဌာနတို့ ပူးပေါင်းဆောင်ရွက်ခဲ့သည့် ရေတွင်အာဆင်းနစ်ပါဝင်မှု ဆိုင်ရာ သုတေသနတွေ့ရှိချက်များနှင့် ဆက်လက်ပူးပေါင်းဆောင်ရွက်မည့် စီမံချက်လုပ်ငန်းတို့နှင့် ပတ်သက်ပြီး ရှင်းလင်းတင်ပြခဲ့ကြပါသည်။ ထိုသို့ရှင်းလင်းတင်ပြရာတွင် - ဆေးသုတေသနဦးစီးဌာနနှင့် ဂျပန်နိုင်ငံ Miyazaki တက္ကသိုလ်တို့ ပူးပေါင်း၍ ရေတွင်အာဆင်းနစ်ပါဝင်မှုရှိသည့် နေရာဒေသများတွင် ပတ်ဝန်းကျင် သန့်ရှင်းမှုမြှင့်တင်ခြင်းစီမံချက် (The Project for Promoting Environmental Health in Arsenic Contaminated Area in Myanmar) ကို ၂၀၁၅ ခုနှစ်၊ သြဂုတ်လမှ ၂၀၁၈ ခုနှစ် ဇူလိုင်လအထိ ဧရာဝတီတိုင်း ဒေသကြီး၊ သာပေါင်းမြို့နယ်ရှိ ကျေးရွာ (၇) ရွာတွင် ဆောင်ရွက်ခဲ့ပါကြောင်း၊ ထိုသို့ဆောင်ရွက်ခဲ့ရာတွင် ဒေသခံ ကျန်းမာရေးဝန်ထမ်းများနှင့် ပူးပေါင်းကာ ရေတွင်အာဆင်းနစ်ပါဝင်မှုကြောင့် ကျန်းမာရေး ထိခိုက်ပျက်စီးမှု ဆိုင်ရာလေ့လာခြင်း၊ သန့်ရှင်း၍ ဘေးအန္တရာယ်ကင်းသော သောက်သုံးရေ ရရှိရေးလုပ်ငန်းများ (ဒေသထွက် ပစ္စည်းများဖြင့် ဆောင်ရွက်နိုင်သည့် ရေသန့်စင်စနစ်တည်ထောင်ခြင်း) ဆောင်ရွက်ခြင်းနှင့် အဆိုပါနေရာဒေသ များတွင် နေထိုင်သူများ အာဆင်းနစ် အဆိပ်သင့်မှုနှင့်ပတ်သက်၍ ကျန်းမာရေးအသိရှိစေရေး ဆောင်ရွက်ခြင်း လုပ်ငန်းစဉ်များဖြင့် ဆောင်ရွက်ခဲ့ပါကြောင်း၊ ဆက်လက်၍ ရေတွင် အာဆင်းနစ်ပါဝင်မှုများပြားသည့် နေရာ ဒေသများတွင် ကျန်းမာရေးထိခိုက်ဆုံးရှုံးမှုမရှိစေရေး၊ သန့်ရှင်း၍ ဘေးအန္တရာယ်ကင်းသော သောက်သုံးရေ ရရှိရေးဆိုင်ရာ (Implementing the Safe Drinking Water Supply Model for Health Risk Reduction in Highly Arsenic Contamination Area in Myanmar)စီမံချက်ကို ဧရာဝတီတိုင်းဒေသကြီး၊ ကျုံပျော်မြို့နယ်နှင့်ကျောင်းကုန်းမြို့နယ်တို့တွင် ၂၀၁၉ ခုနှစ်မှ ၂၀၂၃ ခုနှစ်အထိ (၄) နှစ်တာကာလ ဆောင်ရွက် သွားမည် ဖြစ်ပါကြောင်း၊ ထိုသို့ဆောင်ရွက်ရာတွင် သုတေသနဆိုင်ရာ လုပ်ငန်းများအနေဖြင့် အဆိုပါနေရာဒေသ များရှိ ရေတွင်းများမှ ရေတွင်အာဆင်းနစ်ပါဝင်မှု၊ ရေတွင်အာဆင်းနစ်ပါဝင်မှုကြောင့် ကျန်းမာရေးထိခိုက်ပျက် စီးမှုတို့နှင့် ပတ်သက်၍ အသေးစိတ်လေ့လာခြင်းလုပ်ငန်းများ၊ သန့်ရှင်း၍ ဘေးအန္တရာယ်ကင်းသော သောက်သုံး ရေရရှိရေးအတွက် ယခင်စီမံချက်တွင်ပြုလုပ်ခဲ့သည့် ရေသန့်စင်စနစ်မှ ရေအရည်အသွေးကိုဆန်းစစ်ခြင်း၊ ပိုမိုကောင်းမွန်၍ နေရာဒေသနှင့်သင့်တော်ပြီး ဒေသထွက်ပစ္စည်းများဖြင့်ဆောင်ရွက်နိုင်သည့် ရေသန့်စင်စနစ်ကို တည်ထောင်ပေးခြင်း၊ အဆိုပါစနစ်နှင့်ပတ်သက်၍ ဒေသခံများကိုယ်တိုင် လုပ်ဆောင်နိုင်ရေး သင်ကြားပြသပေး ခြင်းနှင့် ရေသန့်စင်စနစ် ပြုလုပ်ပုံအညွှန်းစာအုပ်ကို ဒေသခံများအား ပေးအပ်ခြင်းလုပ်ငန်းများ၊ ရေရှည်တည်တံ့ စေရေးအတွက် ယခင်စီမံချက်မှ ရေသန့်စင်စနစ်ကိုလေ့လာ၍ ပိုမိုကောင်းမွန်စေရေးဆောင်ရွက်ခြင်း၊ ယခုစီမံ ချက်ပါ နေရာဒေသများတွင်နေထိုင်သူများ အာဆင်းနစ်အဆိပ်သင့်မှုနှင့် ပတ်သက်၍ ကျန်းမာရေးအသိရှိစေ ရေးဆောင်ရွက်ခြင်း၊ ရေသန့်စင်စနစ်ကို ထိန်းသိမ်းပြုပြင်နိုင်ရန် သင်ကြားပြသပေးခြင်းနှင့် အညွှန်းစာအုပ်ပြုစု ပေးအပ်ခြင်း စသည့်လုပ်ငန်းများ ပါဝင်ပါကြောင်း၊ လုပ်ငန်းများဆောင်ရွက်ရာတွင် ဒေသခံကျန်းမာရေး ဝန်ထမ်းများနှင့် ပူးပေါင်းခြင်း၊ ဒေသခံပြည်သူများ ကိုယ်တိုင်ပါဝင်စေခြင်းတို့ဖြင့် ဆောင်ရွက်သွားမည် ဖြစ်ပါ ကြောင်း ပြောကြားခဲ့ပါသည်။

ပြည်ထောင်စုဝန်ကြီးကပြောကြားရာတွင် - ယခုကဲ့သို့ ဂျပန်နိုင်ငံ Miyazaki တက္ကသိုလ်နှင့် ပူးပေါင်း ဆောင်ရွက်ခဲ့မှုသည် ကောင်းမွန်ပြီး ဆေးသုတေသနဦးစီးဌာနမှ ပါဝင်ဆောင်ရွက်သူများအတွက် အတွေ့အကြုံ ကောင်းများရရှိကာ ဂျပန်နိုင်ငံမှ ခေတ်မီနည်းစနစ်များကို လေ့လာသင်ယူနိုင်မည်ဖြစ်ပါကြောင်း၊ ရေတွင် အာဆင်းနစ်ပါဝင်မှုကြောင့် ကျန်းမာရေး ထိခိုက် ပျက်စီးနိုင်မှုများနှင့် ပတ်သက်၍ ပြည်သူများပိုမိုသိရှိစေရေး၊ ဆောင်ရွက်သွားရမည်ဖြစ်ပါကြောင်း၊ ရေတွင် အာဆင်းနစ်ပါဝင်မှုဆိုင်ရာ သုတေသနများကို ထပ်မံ၍ ကျယ် ကျယ်ပြန့်ပြန့် လုပ်ဆောင်သွားစေလိုပါကြောင်း ပြောကြားခဲ့ပါသည်။ အဆိုပါရှင်းလင်းတင်ပြပွဲသို့ ကျန်းမာရေး နှင့်အားကစားဝန်ကြီးဌာန၊ အမြဲတမ်းအတွင်းဝန် ပါမောက္ခဒေါက်တာသက်ခိုင်ဝင်း၊ အမြဲတမ်းအတွင်းဝန် ဒေါက်တာသာထွန်းကျော်၊ ညွှန်ကြားရေးမှူးချုပ် (ပြည်သူ့ကျန်းမာရေးနှင့်ကုသရေးဦးစီးဌာန) ဒေါက်တာစိုးဦး၊ ညွှန်ကြားရေးမှူးချုပ် (ဆေးသုတေသနဦးစီးဌာန) ပါမောက္ခဒေါက်တာဇော်သန်းထွန်း၊ ဒုတိယညွှန်ကြားရေးမှူး ချုပ် ဒေါက်တာလှိုင်မြတ်သူ၊ သုတေသနမှူး ဒေါက်တာဖြိုးဝေဇင်၊ သုတေသနအရာရှိ ဒေါက်တာမျိုးနန္ဒအောင်၊ ဂျပန်နိုင်ငံ Miyazaki တက္ကသိုလ်မှ Assistant Professor Yasunori Yano၊ Ms. Konishi Arisa နှင့် တာဝန်ရှိသူများ တက်ရောက်ခဲ့ကြပါသည်။


သုတေသနည်းပညာဘာသာရပ် (Research Methodology) သင်တန်းဖွင့်လှစ်ပို့ချ

အားကစားအထူးပြုဘာသာရပ် B.Sc. (Sport) သင်တန်းတွင် တက်ရောက်နေသော သင်တန်းသားများ အတွက် သုတေသနနည်းပညာ သင်တန်းဖွင့်ပွဲ အခမ်းအနားကို ၂၀၁၉ ခုနှစ် ဇူလိုင် ၁၂ ရက် နံနက် ၉:၀၀ နာရီ တွင် ရန်ကုန်တိုင်းဒေသကြီး၊ ဗဟန်းမြို့နယ်၊ တာမွေကြီး(ခ)ရပ်ကွက်ရှိ အားကစားနှင့်ကာယပညာသိပ္ပံ (ရန်ကုန်)တွင် ကျင်းပပြုလုပ်ခဲ့ပါသည်။ အဆိုပါဖွင့်ပွဲအခမ်းအနားသို့ ဆေးသုတေသနဦးစီးဌာနမှ ညွှန်ကြားရေးမှူး(သုတေသန) ဒေါက်တာ သိင်္ဂီသွင်နှင့် ညွှန်ကြားရေးမှူးများ၊ သင်ကြားပို့ချသူများ၊ ကြီးကြပ်ပံ့ပိုးသူများနှင့် သင်တန်းသား/သင်တန်းသူ (၄၁) ဦးတို့ တက်ရောက်ခဲ့ကြပါသည်။ ထို့နောက်သင်တန်းကို စတင်ရာ ဒေါက်တာစောစောက What is Research?၊ ဒေါက်တာ ဝါဝါအောင်က Problem Identification၊ ဒေါ်ချိုမာဦးက Literature Search၊ ဒေါက်တာသိင်္ဂီသွင် က Formulation of Objectives and Hypothesis တို့ကို သင်ကြားပို့ချခဲ့ကြပြီး သင်တန်းသားများအား Group Work များပြုလုပ်စေပါသည်။ သင်တန်းကာလအတွင်း သင်တန်းသားများအား အုပ်စု (၃) စုခွဲပြီး သုတေသန အဆိုပြုလွှာများကို ရေးဆွဲပြုစုကြရမည်ဖြစ်ပါသည်။ စုစုပေါင်းသင်တန်းကာလမှာ (၇ပတ်) ကြာ မည်ဖြစ်ပြီး အပတ်စဉ် သောကြာနေတိုင်း ဆေးသုတေသနဦးစီးဌာနမှ သုတေသီပညာရှင်များက သုတေသန နည်းပညာများကို ဆွေးနွေးပွဲပုံစံဖြင့် သင်ကြားပို့ချပေးမည်ဖြစ်ပါသည်။


ကျန်းမာရေးနှင့်အားကစားဝန်ကြီးဌာန ဓမ္မာရုံဝါဆိုသင်္ကန်းကပ်လှူပူဇော်ရေး ညှိနှိုင်းအစည်းအဝေးကျင်းပ

ကျန်းမာရေးနှင့်အားကစားဝန်ကြီးဌာန ဓမ္မာရုံဝါဆိုသင်္ကန်းကပ်လှူပူဇော်ရေး ညှိနှိုင်းအစည်းအဝေးကို ၂၀၁၉ ခုနှစ် ဇူလိုင် ၁၅ ရက် (တနင်္လာနေ့) မွန်းလွဲ ၁:၀၀ နာရီတွင် ဆေးသုတေသနဦးစီးဌာန အဆင့်မြင့် မော်လီကျူးသုတေသနဌာန အစည်းအဝေးခန်းမ(၂)၌ ကျင်းပရာ ဆေးသုတေသနဦးစီးဌာန ညွှန်ကြားရေးမှူး ချုပ် ပါမောက္ခဒေါက်တာဇော်သန်းထွန်းကိုယ်စား ဒုတိယညွှန်ကြားရေးမှူးချုပ် ဒေါက်တာခင်စောအေးက အဖွင့်အမှာစကား ပြောကြားပါသည်။ ဆက်လက်၍ ဒေါက်တာခင်စောအေးက ၂၀၁၈ ခုနှစ် ကထိန်သင်္ကန်း ကပ်လှူဒါန်းမှု အစည်းအဝေးမှတ်တမ်းအား အတည်ပြုနိုင်ရန်တင်ပြပြီး၊ ဝါဆိုသင်္ကန်း ဆက်ကပ်လှူဒါန်းပွဲကို ၂၀-၇-၂၀၁၉ တွင် ကျင်းပရန် ဝန်ကြီးဌာနမှ သတ်မှတ်ပေးထားခြင်းနှင့် အထွေထွေလိုအပ်ချက်များကို ရှင်းလင်း တင်ပြပါသည်။ ထို့နောက် ညွှန်ကြားရေးမှူး (အထွေထွေစီမံခန့်ခွဲရေး) ဒေါက်တာတင်ဦးက ကျင်းပပြီးစီးခဲ့သော ၂၀၁၈ ခုနှစ် ကထိန်သင်္ကန်း ကပ်လှူပူဇော်ပွဲ အလှူငွေရရှိမှုနှင့် သုံးစွဲမှုငွေစာရင်းရှင်းတမ်းကို ရှင်းလင်းတင်ပြ အတည်ပြုပါသည်။ ဆက်လက်၍ ဝါဆိုသင်္ကန်းဆက်ကပ်လှူဒါန်းပွဲအတွက် တက်ရောက်လာသူများက တင်ပြ လာသော လှူဒါန်းမည့် အလှူငွေ၊ သင်္ကန်းခြင်း၊ ဆွမ်းနှင့်ဆွမ်းဟင်းများ စာရင်းကို ဒုတိယညွှန်ကြားရေးမှူး (အုပ်ချုပ်/စီမံ) ဒေါက်တာနီသက်ဦးက စုစည်းဖတ်ကြား၍ အတည်ပြုပါသည်။ အဆိုပါညှိနှိုင်းအစည်းအဝေးသို့ ကျန်းမာရေးနှင့်အားကစားဝန်ကြီးဌာနလက်အောက်ရှိ ဦးစီးဌာနများ၊ ဆေးတက္ကသိုလ်များ၊ နှီးနွှယ်တက္ကသိုလ် များ၊ ဆေးရုံကြီးများ၊ တိုင်းဦးစီးဌာနများမှတာဝန်ရှိသူများ တက်ရောက်ခဲ့ကြပါသည်။


ကျန်းမာရေးနှင့်အားကစားဝန်ကြီးဌာန၊ သုတေသနကျင့်ဝတ်နှင့်ကျွမ်းကျင်မှုပိုင်းဆိုင်ရာ ဆန်းစစ်သုံးသပ်မှုဘုတ်အဖွဲ့၏ အဖွဲ့ဝင်များ စွမ်းဆောင်ရည်မြှင့်တင်မှု အလုပ်ရုံဆွေးနွေးပွဲကျင်းပ

၂၀၁၉ ခုနှစ် ဇူလိုင် ၁၇ ရက် နံနက် ၉:ဝဝ နာရီတွင် ကျန်းမာရေးနှင့်အားကစားဝန်ကြီးဌာန၊ သုတေသန ကျင့်ဝတ်နှင့်ကျွမ်းကျင်မှုပိုင်းဆိုင်ရာ ဆန်းစစ်သုံးသပ်မှုဘုတ်အဖွဲ့၏ အဖွဲ့ဝင်များ စွမ်းဆောင်ရည်မြှင့်တင်မှု အလုပ်ရုံဆွေးနွေးပွဲ Capacity Building Workshop for Institutional Review Board (IRB) Members, Ministry of Health and Sports, Myanmar ဖွင့်ပွဲအခမ်းအနားကို ဆေးသုတေသနဦးစီးဌာန အဆင့်မြင့် မော်လီကျူးသုတေသနဌာန အစည်းအဝေးခန်းမ(၂)၌ ကျင်းပပြုလုပ်ရာ ပြည်ထောင်စုဝန်ကြီး ဒေါက်တာ မြင့်ထွေး၏ကိုယ်စား အမြဲတမ်းအတွင်းဝန် ပါမောက္ခဒေါက်တာသက်ခိုင်ဝင်း တက်ရောက်၍ ပြည်ထောင်စု ဝန်ကြီး၏ သဝဏ်လွှာကိုဖတ်ကြားပြီး အဖွင့်အမှာစကား ပြောကြားသည်။

ထို့နောက် ဆေးသုတေသနဦးစီးဌာန ညွှန်ကြားရေးမှူးချုပ် ပါမောက္ခ ဒေါက်တာဇော်သန်းထွန်းက ကြိုဆို နှုတ်ခွန်းဆက်စကား ပြောကြားသည်။ ဖွင့်ပွဲအခမ်းအနား အပြီးတွင် တက်ရောက်သူများ စုပေါင်း၍ အမှတ်တရ ဓာတ်ပုံရိုက်ကူးခဲ့ကြသည်။ အဆိုပါ အခမ်းအနားသို့ ကျန်းမာရေးနှင့်အားကစားဝန်ကြီးဌာန အမြဲတမ်းအတွင်းဝန် ပါမောက္ခ ဒေါက်တာသက်ခိုင်ဝင်းနှင့် သုတေသနကျင့်ဝတ်နှင့်ကျွမ်းကျင်မှုပိုင်းဆိုင်ရာ ဆန်းစစ်သုံးသပ်ရေး ဘုတ်အဖွဲ့ (၅)ဖွဲ့မှ ဥက္ကဋ္ဌနှင့် အဖွဲ့ဝင်များ၊ ဖိတ်ကြားထားသူများ စုစုပေါင်း (၇၅) ဦးတက်ရောက်ခဲ့ကြပြီး ဇူလိုင် ၁၇ ရက်မှ ၁၈ ရက်နေ့အထိ ၂ ရက်ကြာ ပြုလုပ်ခဲ့သည်။

အလုပ်ရုံဆွေးနွေးပွဲ ပထမနေ့အစီအစဉ်ကို ဇူလိုင် ၁၇ ရက် နံနက် ၉:၃၀ နာရီတွင် စတင်ကျင်းပရာ သဘာပတိအဖြစ် အမြဲတမ်းအတွင်းဝန် ပါမောက္ခဒေါက်တာသက်ခိုင်ဝင်းက ဆောင်ရွက်ပြီး အလုပ်ရုံဆွေးနွေးပွဲ နှင့်ပတ်သက်သည်များကို ကျန်းမာရေးနှင့်အားကစားဝန်ကြီးဌာန၊ သုတေသနကျင့်ဝတ်နှင့် ကျွမ်းကျင်မှုပိုင်းဆိုင်ရာ ဆန်းစစ်သုံးသပ်မှုဘုတ်အဖွဲ့ အမှတ် (၁) ဥက္ကဋ္ဌ ဒေါက်တာမျိုးခင်က ပြောကြားသည်။ ထို့နောက်တက်ရောက်လာကြသည့် သူများက တစ်ဦးချင်း မိတ်ဆက်စကား ပြောကြားသည်။ ဆက်လက်၍ ဒေါက်တာ မျိုးခင်က Research Ethics: An Overview၊ ပြည်သူ့ကျန်းမာရေးတက္ကသိုလ် သုတေသနကျင့်ဝတ်နှင့် ကျွမ်းကျင်မှုပိုင်းဆိုင်ရာ ဆန်းစစ်သုံးသပ်မှုဘုတ်အဖွဲ့ ဥက္ကဋ္ဌ ဒေါက်တာမြတ်ဘုန်းကျော်က Institutional Review Board (IRB) Forms to be used တို့ကို တင်ပြဆွေးနွေးရာ တက်ရောက်ကြသူများက ဝိုင်းဝန်း အကြံပြု ဆွေးနွေးခဲ့ကြသည်။

မွန်းလွဲပိုင်းတွင် ဆွေးနွေးပွဲကို ဆက်လက်ကျင်းပရာ သဘာပတိအဖြစ် ဒေါက်တာမျိုးခင်က ဆောင်ရွက်ပြီး ပြည်သူ့ကျန်းမာရေးတက္ကသိုလ် သုတေသနကျင့်ဝတ်နှင့်ကျွမ်းကျင်မှုပိုင်းဆိုင်ရာ ဆန်းစစ်သုံးသပ်မှုဘုတ်အဖွဲ့ ဒုတိယဥက္ကဋ္ဌ ပါမောက္ခဒေါက်တာလှလှဝင်းက Public Health Ethics၊ ဒေါက်တာစောစောနှင့် ဒေါက်တာငြိမ်း ဆုအေးတို့က Ethical Issues in Qualitative Research, Behavioral Research, Epidemiological Research and International Health Research ၊ ဒေါက်တာသိင်္ဂီသွင်က CIOMS Guidelines ၊ ဒေါက်တာ ရဲထွဋ်က Operational Guidelines for Ethics Committees that Review Biomedical Research တို့ကို အသီးသီး ဆက်လက် ရှင်းလင်းတင်ပြကြသည်။

အလုပ်ရုံဆွေးနွေးပွဲ ဒုတိယနေ့အစီအစဉ်ကို ဇူလိုင် ၁၈ ရက် နံနက် ၉:၀၀ နာရီတွင် စတင်ကျင်းပရာ သဘာပတိအဖြစ် ကျန်းမာရေးနှင့်အားကစားဝန်ကြီးဌာန၊ သုတေသနကျင့်ဝတ်နှင့် ကျွမ်းကျင်မှုပိုင်းဆိုင်ရာ ဆန်းစစ်သုံးသပ်မှုဘုတ်အဖွဲ့ အမှတ် (၂) ဥက္ကဋ္ဌ ဒေါက်တာရီရီမြင့်က ဆောင်ရွက်ပြီး ဒေါက်တာယဉ်သက်နုဦးက IRB Networking နှင့်ပတ်သက်၍ ရှင်းလင်းတင်ပြရာ တက်ရောက်သူများက ဝိုင်းဝန်းအကြံပြု ဆွေးနွေးခဲ့ကြ သည်။ ထို့နောက် ဆေးသုတေသန ဦးစီးဌာနမှ ညွှန်ကြားရေးမှူး(သုတေသန)ဒေါက်တာမို့မို့ထွန်းက မြန်မာနိုင်ငံ ကျန်းမာရေးဆိုင်ရာ သုတေသနမှတ်ပုံတင်ခြင်း(MHRR)နှင့် ပတ်သက်၍ ရှင်းလင်းတင်ပြပါသည်။ ထို့နောက် ဆွေးနွေးပွဲ တက်ရောက်လာသူများသည် ဆေးသုတေသနဦးစီးဌာန စီမံခန့်ခွဲရေးအဆောက်အဦရှိ Ethic Review Committee ရုံးခန်းသို့ သွားရောက်လေ့လာကြည့်ရှုခဲ့ကြသည်။ ဆက်လက်၍ဆွေးနွေးပွဲကို ပြန်လည် စတင်ရာ ဒေါက်တာလှိုင်မြတ်သူက Framework for Development of Guidelines for Responsible Conduct of Research ရှင်းလင်းတင်ပြပါသည်။ မွန်းလွဲပိုင်းတွင် သဘာပတိအဖြစ် ပြည်သူ့ကျန်းမာရေး တက္ကသိုလ်၊ သုတေသနကျင့်ဝတ်နှင့်ကျွမ်းကျင်မှုပိုင်းဆိုင်ရာ ဆန်းစစ်သုံးသပ်မှု ဘုတ်အဖွဲ့ ဒုတိယဥက္ကဋ္ဌ ပါမောက္ခဒေါက်တာလှလှဝင်းက ဆောင်ရွက်ပြီး ကျန်းမာရေးနှင့်အားကစားဝန်ကြီးဌာန၊ သုတေသနကျင့်ဝတ် နှင့်ကျွမ်းကျင်မှုပိုင်းဆိုင်ရာ ဆန်းစစ်သုံးသပ်မှုဘုတ်အဖွဲ့ အမှတ် (၂) ဥက္ကဋ္ဌ ဒေါက်တာ ရီရီမြင့်က World Medical Association (WMA) Declaration of Helsinki၊ ဒေါက်တာယဉ်သက်နုဦးက Informed Consent၊ ဆေးသုတေသနဦးစီးဌာန၊ သုတေသနကျင့်ဝတ်နှင့်ကျွမ်းကျင်မှုပိုင်းဆိုင်ရာ ဆန်းစစ် သုံးသပ်မှု ဘုတ်အဖွဲ့ ဥက္ကဋ္ဌ ဒေါက်တာခင်သက်ဝေက Accreditation Requirements of FERCAP တို့ကို တင်ပြ ဆွေးနွေးခဲ့ကြသည်။ ထို့နောက် ဒေါက်တာမျိုးခင်က တက်ရောက်လာကြသော IRB ဘုတ်အဖွဲ့ဝင်များ အား နိဂုံးချုပ်အမှာစကားပြောကြားပြီး ဂုဏ်ပြုမှတ်တမ်းလွှာများ ပေးအပ်ချီးမြှင့်ကာ အလုပ်ရုံဆွေးနွေးပွဲကို ညနေ ၅:၀၀ နာရီတွင် ရုပ်သိမ်းလိုက်သည်။


ကျန်းမာရေးနှင့်အားကစားဝန်ကြီးဌာန၏ ၂၀၁၉ ခုနှစ် ဝါဆိုသင်္ကန်းဆက်ကပ်လှူဒါန်းပွဲအခမ်းအနား ကျင်းပ

ကျန်းမာရေးနှင့်အားကစားဝန်ကြီးဌာန၏ ၂၀၁၉ ခုနှစ် ဝါဆိုသင်္ကန်းဆက်ကပ်လှူဒါန်းပွဲ အခမ်းအနား ကို မြန်မာသက္ကရာဇ် ၁၃၈၁ ခုနှစ် ဝါဆိုလပြည့်ကျော် ၄ ရက် (စနေနေ့) ၂၀၁၉ ခုနှစ် ဇူလိုင်၂၀ရက် နံနက် ၉:၃၀ နာရီ တွင် ရန်ကုန်မြို့၊ ဗဟန်းမြို့နယ်၊ မြို့မရပ်ကွက်၊ ရေတာရှည်လမ်းဟောင်း အမှတ်(၂၄)ရှိ ကျန်းမာရေးနှင့် အားကစားဝန်ကြီးဌာန ဓမ္မာရုံ၌ ကျင်းပခဲ့သည်။

အဆိုပါအခမ်းအနားသို့ ရန်ကုန်မြို့ ခြောက်ထပ်ကြီးဘုရားကြီး ကျောင်းတိုက်မှ ဆရာတော် သာသနာ့ဓဇ ဓမ္မာစရိယ အရှင်စန္ဒာဝရအမှူးပြုသော ပင့်သံဃာတော်(၁၀)ပါးတို့ ကြွရောက်တော်မူကြပြီး၊ ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေး၊ ဒုတိယဝန်ကြီး ဒေါက်တာမြလေးစိန်၊ အမြဲတမ်းအတွင်းဝန် ပါမောက္ခဒေါက်တာသက်ခိုင်ဝင်း၊ အမြဲတမ်းအတွင်းဝန် ဒေါက်တာသာထွန်းကျော်၊ ကျန်းမာရေးနှင့် အားကစားဝန်ကြီးဌာနအောက်ရှိ ဦးစီးဌာနများမှ ညွှန်ကြားရေးမှူးချုပ်များ၊ ဆေးတက္ကသိုလ် များ၊ နှီးနွှယ်တက္ကသိုလ်များ၊ ဆေးရုံကြီးများ၊ တိုင်းဦးစီးဌာနများ၊ အဖွဲ့အစည်းများမှ ဖိတ်ကြားထားသူများလည်း တက်ရောက်ခဲ့ကြသည်။ ထို့နောက် ဆရာတော်ထံမှ ငါးပါးသီလ ခံယူဆောက်တည်ကြပြီး ဝါဆိုသင်္ကန်းနှင့် လှူဖွယ်ပစ္စည်းများကို အသီးသီး ဆက်ကပ်လှူဒါန်းကြသည်။

ယင်းနောက် နဝကမ္မအလှူတော်ငွေ ကျပ်သုံးသိန်းကို ဆေးသုတေသနဦးစီးဌာန ညွှန်ကြားရေးမှူး (အထွေထွေစီမံခန့်ခွဲရေး) ဒေါက်တာတင်ဦးက ပေးအပ်လှူဒါန်းရာ အမျိုးသားကျန်းမာရေးဓာတ်ခွဲမှု ဆိုင်ရာဌာန ညွှန်ကြားရေးမှူး ဒေါက်တာဝင်းသိန်းက ကပ္ပိယကာရကအဖြစ် လက်ခံရယူပါသည်။ ဆက်လက်၍ အနုမောဒနာ တရားတော် နာယူကြပြီး လှူဒါန်းမှုအစုစုတို့တွက် ရေစက်သွန်းချ အမျှပေးဝေကာ “ဗုဒ္ဓသာသနံ စိရံတိဋ္ဌတု” သုံးကြိမ်ရွတ်ဆို၍ အခမ်းအနားကို ရုပ်သိမ်းလိုက်သည်။ အခမ်းအနားအပြီးတွင် သံဃာတော်များအား နေ့ဆွမ်း ဆက်ကပ်လှူဒါန်းပြီး ဧည့်ပရိသတ်များအား ထောပတ်ထမင်းဖြင့် တည်ခင်းဧည့်ခံခဲ့သည်။


“Data Management Training Workshop” အလုပ်ရုံဆွေးနွေးပွဲကျင်းပ “Data Management Training Workshop”

အလုပ်ရုံဆွေးနွေးပွဲ ဖွင့်ပွဲအခမ်းအနားကို ၂၀၁၉ ခုနှစ် ဇူလိုင် ၂၂ ရက် နံနက် ၉:၀၀ နာရီတွင် ဆေးသုတေသနဦးစီးဌာန (ပြင်ဦးလွင်ရုံးခွဲ)၌ ကျင်းပပြုလုပ်ခဲ့ရာ ဆေးသုတေသနဦးစီးဌာန ညွှန်ကြားရေးမှူးချုပ် ပါမောက္ခဒေါက်တာဇော်သန်းထွန်း တက်ရောက်၍ အဖွင့်အမှာစကား ပြောကြားခဲ့သည်။ အဆိုပါဖွင့်ပွဲအခမ်းအနားသို့ ပါမောက္ခချုပ် ဆေးဝါးတက္ကသိုလ်(မန္တလေး)၊ ဆေးသုတေသန ဦးစီးဌာနမှ ဒုတိယညွှန်ကြားရေးမှူးချုပ်၊ ညွှန်ကြားရေးမှူးများ၊ လက်ထောက်ညွှန်ကြားရေးမှူး/ဌာနခွဲမှူးများ နှင့် ကျန်းမာရေးနှင့်အားကစားဝန်ကြီးဌာနအောက်ရှိ ကျန်းမာရေး လူ့စွမ်းအား အရင်းအမြစ်ဦးစီးဌာန၊ ပြည်သူ့ ကျန်းမာရေး ဦးစီးဌာန၊ ကုသရေးဦးစီးဌာန၊ တိုင်းရင်းဆေးပညာဦးစီးဌာန၊ အစားအသောက်နှင့်ဆေးဝါးကွပ်ကဲ ရေးဦးစီးဌာနတို့မှ ဖိတ်ကြားထားသော သင်တန်းသား/သူ(၅၀)ဦးနှင့် စုစုပေါင်း(၇၃)ဦး တက်ရောက်ခဲ့ကြသည်။

ဤအလုပ်ရုံဆွေးနွေးပွဲသည် ဆေးသုတေသနဦးစီးဌာန(ပြင်ဦးလွင်ရုံးခွဲ)အား သုတေသန ပြုလုပ်နိုင်ရန် လေ့ကျင့်ပျိုးထောင်သည့်ဗဟိုဌာန (Research Training Center) အဖြစ် အားဖြည့်ဆောင်ရွက်သည့် လုပ်ငန်း စဉ်၏ သတ္တမမြောက်သင်တန်းဖြစ်သည်။ အလုပ်ရုံဆွေးနွေးပွဲ၏ ရည်ရွယ်ချက်မှာ သင်တန်းသား/သူတို့အား Principles of Data Management နှင့် Inference Making Skill on Descriptive and Inferential Statistics, Linear Regression, Logistic Regression, Survival Analysis နှင့် Principal Component Analysis (PCA) စသည်တို့ကို ရှင်းလင်းစွာ နားလည် တတ်ကျွမ်းစေရန် ရည်ရွယ်ပါသည်။ အဆိုပါ ခေါင်းစဉ် များနှင့် ပတ်သက်သော Theory Background, Presentation နှင့် Interpretation တို့ကို စာတွေ့နှင့်လက်တွေ့ အသုံးပြုပြီး ဆေးသုတေသနဦးစီးဌာနမှ သုတေသီများ၊ ပြည်သူ့ကျန်းမာရေး တက္ကသိုလ်နှင့် ဆေးတက္ကသိုလ် (မန္တလေး)တို့မှ ပါမောက္ခများ၊ တွဲဘက်ပါမောက္ခများက ပူးပေါင်းသင်ကြားပေးခဲ့သည်။ အဆိုပါသင်တန်းကို ဇူလိုင်လ (၂၂)ရက်နေ့မှ (၂၆)ရက်နေ့အထိ ကျင်းပပြုလုပ်ခဲ့သည်။


ပါရဂူဘွဲ့လွန်သင်တန်းသားများအတွက် သုတေသနနည်းပညာသင်တန်းဖွင့်လှစ်ရန် ညှိနှိုင်းအစည်းအဝေးကျင်းပ

၂၀၁၉ ခုနှစ် ဇူလိုင် ၂၃ ရက် မွန်းလွဲ ၁:၀၀ နာရီတွင် ကျန်းမာရေးနှင့်အားကစားဝန်ကြီးဌာန ကျန်းမာရေးလူ့စွမ်းအား အရင်းအမြစ်ဦးစီးဌာန အောက်ရှိ တက္ကသိုလ်များတွင် တက်ရောက် နေကြသော ပါရဂူ ဘွဲ့လွန်သင်တန်း သားများအတွက် သုတေသနနည်းပညာသင်တန်း ဖွင့်လှစ်ရန် ညှိနှိုင်းအစည်းအဝေးကို ဆေးသုတေသနဦးစီးဌာန ဇီဝဆေးပညာသုတေသန အစည်းအဝေးခန်းမ၌ ကျင်းပပြုလုပ်ခဲ့သည်။ အဆိုပါ ညှိနှိုင်းဆွေးနွေးပွဲသို့ ဒုတိယ ညွှန်ကြားရေးမှူးချုပ်(သုတေသန) ဒေါက်တာလှိုင်မြတ်သူ၊ ဒုတိယညွှန်ကြားရေးမှူးချုပ်(စီမံ/ဘဏ္ဍာ) ဒေါက်တာဇော်မြင့်နှင့် ညွှန်ကြားရေးမှူးများ၊ သင်တန်းပို့ချမည့်သူများ၊ Facilitator များ တက်ရောက်ခဲ့ကြသည်၊၊ ထို့နောက် ဒုတိယညွှန်ကြားရေးမှူး/ဌာနခွဲမှူး ဒေါက်တာမျိုးမျိုးမွန်က Research Methodology Workshop for PhD Students နှင့် ပတ်သက်၍ အစီအစဉ်မူကြမ်းကို အသေးစိတ်တင်ပြရာ ဒုတိယညွှန်ကြားရေးမှူးချုပ် (သုတေသန) ဒေါက်တာလှိုင်မြတ်သူနှင့် တက်ရောက်လာသူများက ဝိုင်းဝန်း ဆွေးနွေး အတည်ပြုဆုံးဖြတ်ခဲ့ကြသည်၊၊ ထို့နောက် ဒုတိယညွှန်ကြားရေးမှူးချုပ် (သုတေသန) ဒေါက်တာ လှိုင်မြတ်သူက နိဂုံးချုပ် အမှာစကားပြောကြားပြီး ဆွေးနွေးပွဲကို မွန်းလွဲ ၂:၄၅ နာရီတွင် ရုပ်သိမ်းခဲ့သည်၊၊


ကမ္ဘာ့အသည်းရောင်အသားဝါရောဂါတိုက်ဖျက်ရေးနေ့ (၂၀၁၉)ခုနှစ် အထိမ်းအမှတ်အခမ်းအနားကျင်းပ

၂၀၁၈ ခုနှစ် ဇူလိုင် ၂၈ ရက် နံနက် ၈:၃ဝ နာရီတွင် ကျန်းမာရေးနှင့် အားကစား ဝန်ကြီးဌာနနှင့် မြန်မာ အသည်းဖောင်ဒေးရှင်းတို့ ဦးဆောင်ကျင်းပသည့် ကမ္ဘာ့အသည်းရောင် အသားဝါရောဂါတိုက်ဖျက်ရေးနေ့ (၂၀၁၉) ခုနှစ် အထိမ်းအမှတ်အခမ်းအနားကို ရန်ကုန်မြို့၊ သူနာပြုတက္ကသိုလ်(ပင်မ)ခန်းမဆောင်၌ ကျင်းပပြုလုပ်ရာ ပြည်ထောင်စုဝန်ကြီး ဒေါက်တာမြင့်ထွေး တက်ရောက်၍ ကြိုဆိုနှုတ်ခွန်းဆက်စကားပြောကြားသည်။ အဆိုပါ အခမ်းအနားသို့ ကျန်းမာရေးနှင့် အားကစားဝန်ကြီးဌာန အမြဲတမ်းအတွင်းဝန် ပါမောက္ခဒေါက်တာသက်ခိုင်ဝင်း၊ ဆေးသုတေသနဦးစီးဌာန ညွှန်ကြားရေးမှူးချုပ် ပါမောက္ခဒေါက်တာဇော်သန်းထွန်းနှင့် ဖိတ်ကြားထားသူများ တက်ရောက်ခဲ့ကြသည်။ ရှေးဦးစွာ အခမ်းအနားအား မြန်မာအသည်းဖောင်ဒေးရှင်းမိသားစုများက အသည်း ဖောင်ဒေးရှင်းသီချင်းဖြင့် သံပြိုင်သီဆို ဂုဏ်ပြုကြိုဆိုစတင်ဖွင့်လှစ်ခဲ့သည်။ ထို့နောက် မြန်မာအသည်းဖောင်ဒေး ရှင်းဥက္ကဋ္ဌ ဒေါက်တာခင်ပြုံးကြည်က ကြိုဆိုနှုတ်ခွန်းဆက်စကားပြောကြားပြီး ကမ္ဘာ့ကျန်းမာရေးအဖွဲ့၏ မြန်မာနိုင်ငံဆိုင်ရာဌာနေကိုယ်စားလှယ် Dr. Stephen Paul Jost က အမှာစကားပြောကြားသည်။ ဆက်လက် ၍ World Hepatitis Alliance President, Mr. Michael Nimberg ၏ သဝဏ်လွှာကို မြန်မာအသည်း ဖောင်ဒေးရှင်း အလုပ်အမှုဆောင်အဖွဲ့ အတွင်းရေးမှူး ဒေါက်တာစည်သူရက ဖတ်ကြားသည်။ ထို့နောက် အလုပ်အမှုဆောင်အဖွဲ့ဥက္ကဋ္ဌ ဒေါက်တာတင်ညွန့်က မြန်မာအသည်းဖောင်ဒေးရှင်း၏ လက်ရှိဆောင်ရွက်နေမှု များကို Power Point ဖြင့် ရှင်းလင်းပြောကြားပြီး၊ နည်းပညာဆိုင်ရာ အကြံပေးအဖွဲ့ခေါင်းဆောင် ပါမောက္ခ ဒေါက်တာဝင်းနိုင်က "အသည်းကင်ဆာရောဂါသိကောင်းစရာ" ခေါင်းစဉ်ဖြင့် ရှင်းလင်းတင်ပြသည်။ ထို့နောက် Zuellig Pharma Co., Ltd. မှ General Manager, Mr. Frederik က နှုတ်ခွန်းဆက်စကားပြောကြားပြီး၊ GILEAD Sciences Inc. ၏Introductory Video Clip ကိုပြသသည်။ ဆက်လက်၍ ကျန်းမာရေးနှင့် အားကစားဝန်ကြီးဌာန၊ ကမ္ဘာ့ကျန်းမာရေးအဖွဲ့နှင့် မြန်မာအသည်းဖောင်ဒေးရှင်းတို့ ပူးပေါင်းစီစဉ်၍ ဒါရိုက်တာ ထပ်ဆင့်အကယ်ဒမီလူမင်း ရေးသားစီစဉ်ရိုက်ကူးသည့် “အသည်းရောင်ရောဂါ ကင်းဝေးရေး၊ ဝိုင်းဝန်းရှာဖွေ စစ်ဆေးပေး” အစီအစဉ်ကို Video Clip ဖြင့်ပြသခဲ့သည်။ ထို့နောက် မြန်မာအသည်းဖောင်ဒေးရှင်းသို့ ကျပ်ငွေငါးသိန်းနှင့်အထက် လှူဒါန်းသူများနှင့် ဆေးဝါးပစ္စည်းများလှူဒါန်းသော ပုဂ္ဂိုလ်များနှင့် ဆေးကုမ္ပဏီ များအား မြန်မာအသည်းဖောင်ဒေးရှင်း ဥက္ကဋ္ဌ ဒေါက်တာခင်ပြုံးကြည်နှင့် အလုပ်အမှုဆောင်အဖွဲ့ဒုတိယဥက္ကဋ္ဌ ပါမောက္ခဒေါက်တာဝင်းဝင်းဆွေတို့က ဂုဏ်ပြုမှတ်တမ်းလွှာများ ပေးအပ်ခဲ့ပြီး မြန်မာအသည်းဖောင်ဒေးရှင်း ဦးဆောင်အဖွဲ့ဝင် ထပ်ဆင့်အကယ်ဒမီလူမင်းက ကျေးဇူးတင်စကားပြောကြားကာ အခမ်းအနားကို အောင်မြင်စွာ ရုပ်သိမ်းလိုက်သည်။ အခမ်းအနားအပြီးတွင် တက်ရောက်လာသူများ စုပေါင်း၍ အမှတ်တရ ဓာတ်ပုံ ရိုက်ကူးခဲ့ ကြသည်။ အဆိုပါအခမ်းအနားသို့ တက်ရောက်လာသူများအား အကျွေးအမွေးဖြင့်ဧည့်ခံ၍ သွေးစစ်ခြင်း၊ ဘီပိုး ကာကွယ်ဆေးထိုးနှံပေးခြင်းတို့ကိုလည်း ဆောင်ရွက်ပေးခဲ့သည်။


သုတေသနပူးပေါင်းဆောင်ရွက်ရေးဆိုင်ရာ နှစ်ဖက်နားလည်မှုစာချွန်လွှာ လက်မှတ်ရေးထိုးပွဲအခမ်းအနားကျင်းပ

၂၀၁၉ ခုနှစ် ဇူလိုင် ၂၉ ရက် မွန်းလွဲ ၁:၀၀ နာရီတွင် ပြည်ထောင်စုသမ္မတမြန်မာနိုင်ငံတော် ကျန်းမာရေး နှင့်အားကစားဝန်ကြီးဌာန၊ ဆေးသုတေသနဦးစီးဌာနနှင့် ကိုရီးယားသမ္မတနိုင်ငံ Ajou University တို့၏ သုတေသနပူးပေါင်းဆောင်ရွက်ရေးဆိုင်ရာ နှစ်ဖက်နားလည်မှုစာချွန်လွှာ(MoU) လက်မှတ်ရေးထိုးပွဲကို ဆေးသုတေသနဦးစီးဌာန ဗဟိုဇီဝဆေးပညာစာကြည့်တိုက် အစည်းအဝေးခန်းမ (၁)၌ ကျင်းပပြုလုပ်ခဲ့ရာ ဆေးသုတေသနဦးစီးဌာန ညွှန်ကြားရေးမှူးချုပ် ပါမောက္ခဒေါက်တာဇော်သန်းထွန်း တက်ရောက်၍ အမှာစကား ပြောကြားပါသည်။ အဆိုပါလက်မှတ်ရေးထိုးပွဲသို့ ဆေးသုတေသနဦးစီးဌာနမှ ဒုတိယညွှန်ကြားရေးမှူးချုပ် (သုတေသန) ဒေါက်တာခင်စောအေး၊ ဒုတိယညွှန်ကြားရေးမှူးချုပ် (စီမံ/ဘဏ္ဍာ) ဒေါက်တာဇော်မြင့်နှင့် ညွှန်ကြားရေးမှူးများ၊ ကိုရီးယားသမ္မတနိုင်ငံ အင်ဟာတက္ကသိုလ်မှ ပါမောက္ခဒေါက်တာ Tong-Soo KIM တို့တက်ရောက်ခဲ့ကြပါသည်။ ထို့နောက် နှစ်ဖက်နားလည်မှုစာချွန်လွှာ (MoU) အား ဆေးသုတေသနဦးစီးဌာန ညွှန်ကြားရေးမှူးချုပ် ပါမောက္ခဒေါက်တာဇော်သန်းထွန်းနှင့် ကိုရီးယားသမ္မတနိုင်ငံ အင်ဟာတက္ကသိုလ်မှ ပါမောက္ခဒေါက်တာ Tong-Soo KIM တို့က လက်မှတ်ရေးထိုးခဲ့ကြပြီး အပြန်အလှန်လဲလှယ်ခဲ့ကြပါသည်။


Short course on “Literature Search and Reference Management” အလုပ်ရုံဆွေးနွေးပွဲကျင်းပ

၂၀၁၉ ခုနှစ် ဇူလိုင် ၃၀ ရက် နံနက် ၉:၃၀ နာရီတွင် Short course on “Literature Search and Reference Management” အလုပ်ရုံဆွေးနွေးပွဲဖွင့်ပွဲ အခမ်းအနားကို ဆေးသုတေသနဦးစီးဌာန (ပြင်ဦးလွင်ရုံးခွဲ) ၌ကျင်းပပြုလုပ်ခဲ့သည်။ အခမ်းအနားကို ဆေးသုတေသနဦးစီးဌာန ဒုတိယညွှန်ကြားရေးမှူးချုပ်(သုတေသန) ဒေါက်တာခင်စောအေးက အဖွင့်အမှာစကားပြောကြားပြီးဖွင့်လှစ်ခဲ့သည်။ အဆိုပါဖွင့်ပွဲအခမ်းအနားသို့ ဆေးသုတေသနဦးစီးဌာနမှ ဒုတိယညွှန်ကြားရေးမှူးချုပ်၊ ညွှန်ကြားရေးမှူးများ၊ လက်ထောက်ညွှန်ကြားရေးမှူး/ဌာနခွဲမှူးများနှင့် ကျန်းမာရေးနှင့်အားကစားဝန်ကြီးဌာန လက်အောက် ရှိ ကျန်းမာရေးလူ့စွမ်းအားအရင်းအမြစ်ဦးစီးဌာန၊ တိုင်းရင်းဆေးပညာဦးစီးဌာနတို့မှ ဖိတ်ကြားထားသော သင်တန်းသား/သူများ(၃၂)ဦး စုစုပေါင်း(၆၃)ဦးတက်ရောက်ခဲ့ကြသည်။ ဤအလုပ်ရုံဆွေးနွေးပွဲသည် ဆေးသုတေသနဦးစီးဌာန(ပြင်ဦးလွင်ရုံးခွဲ)အား သုတေသန ပြုလုပ်နိုင်ရန် လေ့ကျင့်ပျိုးထောင်သည့် ဗဟိုဌာန (Research Training Center) အဖြစ် အားဖြည့်ဆောင်ရွက်သည့် လုပ်ငန်းစဉ်၏ အဌမမြောက်သင်တန်းဖြစ်သည်။ အလုပ်ရုံဆွေးနွေးပွဲ၏ ရည်ရွယ်ချက်မှာသင်တန်းသား/သူတို့အား သုတေသန သတင်းအချက်အလက်များ ကို စနစ်တကျရှာဖွေကိုးကားနိုင်စေရန် Literature Search and Reference Management ပြုလုပ်ရာတွင် နည်းစနစ်တို့ကို ရှင်းလင်းစွာနားလည်တတ်ကျွမ်းစေရန်ရည်ရွယ်ပါသည်။ အဆိုပါခေါင်းစဉ်များနှင့် ပတ်သက် သော Theory Background, Presentation နှင့် Demonstrating, Hards-on exercise, Discussion, Assignment တို့ကိုအသုံးပြုပြီး ဆေးသုတေသနဦးစီးဌာနမှ သုတေသီများ၊ ဆေးတက္ကသိုလ်(မန္တလေး)မှ ဆရာ များနှင့် The Union အဖွဲ့အစည်းမှ ဆရာများ ပူးပေါင်းသင်ကြားပေးခဲ့သည်။ အဆိုပါသင်တန်းကို ဇူလိုင်လ (၃၀)ရက်နေ့မှ (၃၁)ရက်နေ့ အထိကျင်းပပြုလုပ်ခဲ့သည်။